Latest Entries »

Teri Nigaahein

Is dil pe kuch ajeeb sa asar hua tha,

jab teri nigahon ne ise chua tha;

maine dekha tha jab inme to main inki khubsurati mein khoya tha.

Ye teri hi nigaahein to thi jinhe yaad kar kar main raat bhar na soya tha,

tanhai mein jab yaad kiya tujhe bas inki hi gehraiyon mein to main khoya tha.

Jab bhi dekhta hun inme mein doob sa jaata hun;

Bhari bheed mein akela sa ho jaata hun,

Dil kho jaata hain gujre waqt ki yaadon mein;

aur main bin baat ke hi muskuraata hun.

Ke in nigaahon pe hi bas main aake ruk jaata hun, ke inke aage bebas hokar na tujhe kuch bol paata hun, inki khubsurati na bayaan kr paata hun, bas har baar thaga sa reh jaata hun,ke har baar thaga sa reh jaata hun.

Dil fir tujhpe aaya hai

ye dil fir ek baar tujhpe aaya hai, humne har lamhe mein har jarre mein tujhe hi paaya hai;

main gayan hun dusre shehar dusre desh par tu mere saath saath chala aaya hai;

Maine apni saanson mein bhi to tera hi ehsaas paaya hai,ke kuch tu yun mujhme samaaya hai ke jaise tu mera saaya hai.

ke haal kuch ajeeb sa hai mera

Again in a poetic mood,so here it goes :
Ke haal kuch ajeeb sa hai mera mere yaaron ;
Khud hi se khafa hun aur Khud hi ko dhundta hun.

Ishk wale bhi ajeeb hote hain

Kabhi falsafon mein to kabhi kehkahon mein lamhe tamaam karte hain,
ye ishk wale bhi ajeeb hote hai shaam ko din aur din ko shaam kiya krte hain.

Aaj kuch pal mile fursat ke………..

Aaj kuch lamhe mile the fursat ke
socha mujhe kyun mile ye din gurbat ke.
Aankhon pe chaane se lage wo bittaye lamhe;
wo haseen din wo dilchasp raatein;
jab har pal tere aane ka intejaar rehta tha;
jab har main tera deedaar karna chahta tha;
tere intejaar mein main palkein bichaye rehte tha;
aaj na jaane kyun fir wo sab kuch yaad aa rha hai,
dil fir se un sab yaadon mein doobta jaa rha hai.

Koshishe krta rha hun main tujhe bhool jane ki;
hadein paar kar chuka hun ab khuda ko manaane ki;
ab to dil bas ek sukoon sa chahta hai
sab kuch chod kar kahin door jaana chahta hai;
jahan un lamhon ko main har pal jiyun;
bheeg jaun teri yaadon ki barsaat mein;
aur rahun teri haseen julfon ki chaanw mein;
fir se us har pal ko jinda karun;
kyun main kisi ki parwaah karun ab kis baat se main darun;
hamesha jiyan hun main apni sharton par;
haar nahi maani hai kabhi mushkilon se haar kar;
fir kaise main baith jaaun apna sab kuch haar kar;
haalat ke aage khud ko bebas maan kar;
To be continued……………

Kaise kar paunga kabhi bayaan main tujhe,

jab lafj hi bhool jaata hun tujhe yaad karne ke baad.

Jab se unhe Chaahne lage hain……….

Ab din ke lamhe kuch alag se najar aane lage hain,
Unke bina beetne wale saare pal sataane lage hain,
Unse jyaada unki parwaah hum jataane lage hain,
jab se hum unhe chahne lage hain.

Subah uthte hain ab unki aawaaj ki kashish sun kar,

Raaton ko aate hain wo haseen khwaab bankar,
Raahon mein saath saath chalte hain wo saaya bankar,
Ab to har lamhe mein wo apna asar dikhaane lage hain,
jab se hum unhe chaahne lage hain.

Phool ab kuch jyaada haseen lagte hain,
Unke bina bitaaye pal gamgeen lagte hain,
Ab ek wo hi jahaan mein sabse haseen lagte hain,
Ab to jaise hamein wo kaaynat se juda sa karne lage hain,
jab se hum unhe chaahne lage hain.

Ab har pal unka saath bitaane ko jee karta hai,
Ab to har saans unke naam kar jaane ka jee karta hai,
Ab to unke bina sirf marne ka jee karta hai,
Ab to wo hamein apna ek hissa sa najar aane lage hain,
jab se hum unhe chahne lage hain.

Din bhar jeete hain unki baaton ko saath lekar,
Shaam aati hai saanson mein unki khushboo lekar,
Har sans aati hai jaati hai unki mohabbat ka paigam lekar,
Dil ki har dhadkan poori hoti hai khud ko unke naam likh kar,
Ab to har dhadkan par wo apna haq sa jataane lge hain,
Har pal mein wo mujh par chaane se lage hain,
jab se haan jb se hum unhe chahne lage hain

Yun to aasma se koi mohabbat ka rishta nahi mera,
Par na jaane kyun use dekh use baahon mein bharne ka jee karta hai.

Waqt yun hi badal jaata hai…………

Abhi kal hi ki to baat thi

befikar gujra karti raat thi

har subah suhaani hua karti thi

har waqt labon pe ek kahaani hua krti thi

Ab na jaane kab din dhal jaata hai

sach hai yun hi waqt badal jaata hai.

Beeta karti thi shaamein yaron ke sang

waqt kat ta tha dil ke pyaaron ke sang

har pal rehte apni hi dhun mein malang

khwaab aise the ki duniya lagti thi tang

Ab har pal puraana yaad aata hai

na jaane kyun waqt badal jaata hai.

Wo kabhi ghumne ke liye jaana

bahaane bana kr do do din ghar na aana

Wo sabko apni baaton se ghumaana

doston ke saath majaak banana

Ab na wo dost saath hain

na wo baatein majaak hain

Ab to har pal kaam mein hi beet jaata hai

Ab na koi mil paata hai

Na koi majaak banaata hai

Sach hai waqt yun hi badal jaata hai

Insaan bebas khada dekhta hi reh jaata hai

Waqt yun hi badal jaata hai

Teri mohabbat mein maine kya khoya kya paaya

Yun hi baithe baithe ek din ye khyaal aaya
Ki tujhse pyaar karke maine kya khoya maine kya paaya
Har din gujra teri baat krke
Raatein beetein tujhe yaad krke
Har ik lamha tere saaye mein bitaaya
Aur maine socha tere ishq mein maine kya khoya aur kya paaya.
Yun to doston se milta rehta hun main ab bhi
Ghanton kisi ki b baatein kr leta hun ab b
Magar ajeeb laga jb ek anjaan chehre mein tera chehra najar aaya
Aur har kisi ki baat mein tera ek zikar sa paaya.
Aur fir se mere jehan mein ye sawaal aaya ki tere ishq mein maine kya khoya aur kya paaya.
Har subah uth kar dekha ki kahin tera koi pegaam to nhi,
Har shaam tere bina aisi beetein jaise koi aaraam nhi
Yun to tha sab kuch paas mere bas ek tu hi thi nahi
Par tu door hokar bhi mujhse juda to nahi
Fir akhir maine apne naadan dil ko ye sach samjhaaya ki teriĀ  mohabbat mein maine paaya hi paaya
Maana ki tu nahi paas mere magar hai tu har pal saath mere.
Har dum har kadam saath chlata hai mere tera hi saaya
kyun main sochun ki maine teri mohabbat mein kya khoya kya paaya
Jab mein jaanta hun ki tune hi mujhe pyaar karna sikhaaya
Tune hi mujhe mujhse rubaroo krwaaya
Ek beparwaah parinde se tune hi to mujhe insaan baanaaya
Sach to ye hi hai ki tujhe pyaar krke maine sirf paaya hi paaya
Main to khushnaseeb hun ki maien tujhsa mehboob paaya
Ke maine tujhsa mehboob paaya
Ke haan tujhsa mehboob paaya